في خطوة غريبة" مُراقب مباراة المغرب ومصر ومُعدّ التقرير المُتسبّب في إيقاف بوفال وشاكلا كونغولي الجنسية!

#منقول
السلام عليكم
بغيت نشارك تجربة ديالي مع كورونا وانا طنجاوية (يعني معاناة ساكنة طنجة) وبغيت كلشي يستافد من هاذ تجربة، كورونا فعلا مرض وكاين لكن خس انسان يعرف كيف يتعامل معاه مايعطيهشي الخوف بزاف، ومكايقتلشي كايقتل الإهمال وتأخر في العلاج حتى كايوصل انسان لمراحل الأخيرة.

الأب ديالي هو لي مرض بيه راجل عندو 73سنة نهار الأول حاس بحرارة ماشي طبيعية بالمرة، سخانة والفشل وجهد والو وخسو غي ينعاس ماكايقدرشي يوقف فقدان شهية، مشينا لطبيب عام عطانا فيتامينات ماقالناشي شنو فيه، دار عليه اسبوع بالضبط ديناه لطبيب باطني عطانا تحاليل وسكانير، خرجت فيه كورونا، عطاني دوا لي منتاشر دابا في فايسبوك فيتامين C D Zinc Azit doliprane,
وعطاني نصائح قالي يدوز يوماين اذا ماتحسنشي ديه لمحمد 6، قوتلو لأ ان شاء الله في دار يتعالج، مهم جينا لدار تساخرنا سخرة كبيرة تكفينا 15 يوم، خدينا دوا فيتامينات لينا كاملين، وعملنا الحجر لراسنا، الواليد عطيناه دواء نهار الأول ودوليبران في الليل ونعاس بسخانة ودوا عرق بزااااااف، بايتين كنطللو عليه، جبرناه فازك بدلنالو كلشي بالحوايج بالفراش، وعاود عطيناه، دوليبران أخرى، وطبعا بالكمامة ولابسين مزيان غي كنخرجو من عندو كنغسلو ونحايدو داك حوايج، كان ضروري خسو 2 دناس للعوين حيث مكانشي كايقدر لا ينوض لا يتحرك، مهم لا غدا صباح شوية موقف راسو وسخانة كتمشي وتجي، وحنا مجابليناه، وكنقطعو البصل دواور ونعمل هالو في قاع رجلو وراسو وربطوهالو، سخانة كتمشي وتجي ولي كايعمل رعشة هو ديك فزاك دحوايج كيبردو عليه ويبقا يترعد، عليها كنا كنبدلولو بزاف، الماكلة مكان كايقدر ياكل والو من غير دشيشة كنا كنعطيواه قد مايقدر ياكل، ونعمل و عصير فواكه بالماء كنطحنوه، دازت يوماين على هاذ حالة نهار ثالث مابقاتشي سخانة، بدينا كنعطيواه ديك تفاحة بنانة بلا مانطحنوهم باش يبدأ ياكل شوية بشوية، ونعطيواه واحد حبة قرنفل يعملا في دوقمو يغززا بسنانو، دابا اللهم ما لك الحمد وقف ومزيان، وبدأ يقولي لي دوزت ماشي كورونا كورونا كتقتل هههههه كنقولو اه غي كذبو علينا ماشي كورون.
وبالنسبة لينا حنا مخالطين شادينا بابنا علينا وبدينا ناكلو فيتامينات وعملو اتاي نعملو فيه 3 حبات قرنفل، نشربو حاجات سخونين ( واخة في هاذ حرار ) في الليل نعملو حليب بفليو، أو سكنجبير، أو عسل حرة، ونعسو وفي صباح نفيقو مرة نعملو عصير لشتين مرة ليمون، مرة نعملو عسل حرة في الماء دافي ونشربوه، ودازت علينا كورونا خفيفة كاملين صراحة مرضنا لكن دووزناها خفيفة غي ترويحة عادية ومشات، حيث كنا كناكلو ونشربو اي حاجة صحية وفيها فيتامين، وبعدنا على البرودة كاملة، ومشروبات الغازية، ودابا كاملين بينا مزيانين وكلشي بخير.
نوصي اي واحد عندو اعراض او مرض او واحد من عائلتو مرض، لي كايقتل غي الخوف من المرض، والتأخير، اذا شفتو عندكم المريض وحسيتو او عرافتو اعراض، بداو مجابلة بالأكل الصحي ماتسناوشي حتى تمشيو تعملو تحاليل ويقولو لكم كورونا وتبقاو فحال حوماق ماعارفين ماتعملو وتسناو الأطباء شنو يعملو، هو فعلا مرض قاسي لكن بالعقل نقدرو نتغلبو عليه.
الله يشافي كل مريض والله يبعد علينا هاذ الوباء